Uhong sa Bungsod

Uhong sa Bungsod
Halin sa tunga ka kiray ni Elboy

Maramig sa gab-i manami iturog
Bag-o mag butlak ya adlaw sa balay manaog
Dara ya pisaw kag mag suray sa tun-og
Hinay-hinay lang basi sa kahon mahulog

Piraw nga mata kibol sa dapadapa
Lawas ni Nanay Mal-am, mapagsi pa
Uhong sa bungsod amo ya pontariya
Sukol kalihon dughan nga masadya

Laylay sa irok tihuhog sa sukdap
Sa banglid mahapit laswa mangalap
Tagabang kag takway manami nga sangkap
Sa likod ka balay dahon ka saging managap

Tinuom nga uhong mananam marimis
Buribudan it asin kag pus-an ka kamatis
Sa mainit nga kan-on sa langgaw nga makahang
Dapal sa pandihado daw sa naga tap-ok lang

Ang gina tandaan uhong sa Bungsod
Likom nga lugar kinahanglan itahod
Indi pag isugid sa imo utod
Hay basi maunahan sa imo pagtalikod